Wayah bengi hawane adhem banget, ing batinku: waduh rasane enak banget yen ana wong neri panganan anget-anget apa maneh weteng wis kemrucuk. Ora let suwe wektu iku ujug-ujug ana sedulur sing ngeteri sega berkat. Alhamdulillah rejeki, kabeh sing ana ing omah dak undang dak ajak mangan bareng.
Nalika sega berkat dibuka,..wih ana lawu pitik dibumbu abang, oseng buncis, ndog asin, lan perkedel. Terus ing kerdos sijine ana rukuk-rukuk, apem, apel, pear, jeruk, lan gedhang. Jan buah karo jajane gedhe-gedhe tenan. Berkat saka ndesa pancen ora ana sing mini, kabeh sarwa gedhe lan marakno tumrap marem sapa wae sing mangan.
Mangan sega berkat mbok menawa ana barokahe dhewe, rasane enak banget tur maregi. Apa maneh ing kono disediani teh pucuk, wiiih tambah sip ae mangane. Aku miwiti mangan segane karo oseng buncis lan perkedele,...beda rasane kaya berkat sing biasane dak pangan. Lagek mangan sak pulok, aku ngomentari panganan kasebut, "Bumbune jan krasa tenan, gurih, sedhep, mantep, weeenak top-markotop". "Wkwkwk, kaya menehi review food flogger ae", iku jarene Amie.
Bar iku ganti Amie sing mangan rukuk-rukuk, dibukak godhonge banjur dheweke ngomong: "Iki jenenge kue moci. Moci beras, isine legi. Enak hare tapi kok kelet yo. Kamangka iki godhonge wis dinehi lenga". Dak sauti, "iku dudu saka tepung beras, nanging saka tepung ketan. Kelete iku amarga kurang santene". Jarene Amie: "Lha iyo tepung beras ketan,...oooh iyo mungkin kurang santene mangkane dadi kelet".
Mangan ora krasa wes meh separuh wakul plastik walimah entek,...nanging arep dak terusna mangan kayane weteng wis ora kuwat. Alhamdulillah, jan wareg tenan. pangucapku bubar mangan sega berkat. Isih ana karene, sega berkat iki mengko delehen ing meja pawon. Jare Amie, lumayan sesuk kena dinggo sarapan. Nalika iku si Sukma teka, "wah mengko kena dipangan bengi-bengi,. tengah wengi maksudku. Karene pitik lan liyane lebokke magicom ae ben ora mambu". Dak sauti, "Iyo kono lebokna magicom eman yen mambu. Rasane enak banget hare". Sukma nggawa karene sega berkat lan sisa buah menyang pawon. Pitik lan karene sega dilebokake magicom, buahe dilebokake kulkas.
Bar wisuh, aku menyang adhik sebelah omahku. Ing kono ponakan-ponakanku padha mangan sega berkat. Waduh jan telap-telep tenan olehe mangan. Sega rong wakul plastik entek sanalika. Pancen anak-anake adhikku (ponakanku) kabeh padha doyan mangan. Wektu iku aku ngomong marang adhikku, "Lho ngono iku rong wakul entek hare". Disauti karo adhikku: "Yo entek ae, Ruli doyan pangan hare. Iku mau karene Fasha yo dientekno pisan". Ancen Ruli olehe mangan ora tolah-toleh. Dheweke nggethu banget, mbrakoti pitik bumbu abang. Jan katon nikmat tenan olehe mangan. Dheweke nganti ora nyauti sapa wae sing ngomentari awake mangan wektu iku. Mbok menawa pancen ana barokahe dhewe. Mula sing diarani mangan sega berkat iku ancen nikmat tenan.
Komentar
Posting Komentar