Rempah-rempah lan Masakan Khas Indonesia
Indonesia wis kondang ing masyarakat manca amarga sugih rempah-rempah. Kayata merica, ketumbar, pala, kunir, jahe, laos, lan liya-liyane. Amarga sugih rempah kasebut, para leluhur jaman biyen wis biasa masak nganggo bumbu alami saka rempah-rempah mau. Ora ana wong sing ora ngerti enake masakan Indonesia. Apa maneh para turis manca negara, saben teka menyang Indonesia mesthi ora tau nglalekna panganan khas Nusantara, upamane rawon, soto, pecel, daging bumbu lapis, bakso, rendang, lan sapanunggalane.
Menawa Surabaya dikenal karo rawon lant ahu campur, kepriye karo Yogyakarta? Sapa sing tau menyang Kutha Yogyakarta? Lha kae mesthi ngerti panganan khasé kang diarani gudeg. Gudeg digawe saka woh nangka enom sing diiris tipis-tipis, banjur diumbah lan digodhog nganggo santen lan bumbu rempah pilihan. Rasane gurih, legi, lan wangi khas santen areh. Sepisan mangan, mesthi marakna kangen. Dudu amarga nyandu, nanging rasane pancen ngangeni.
Beda gudeg, beda maneh karo bandeng presto. Masakan iki misuwur ing Semarang lan Sidoarjo. Yen dipangan kanggo sarapan sega anget, sambel terasi, lan lalapan, sega sawakul kayane ora cukup. Coba, ana sing tau masak bandeng presto apa durung? Yen kepengin mangerteni carane nggawe bandeng presto, bisa mbukak YouTube utawa langsung pinuju Semarang utawa Sidoarjo, amarga ing kana akeh masyarakat sing isih mbudayakake masakan khas daerah iki. Saben dina ana wae sing pesen, nganti para pelaku usaha terus-terusan nggawe lan masarke tekan luar Jawa lan luar negeri.
Saiki, yen wong manca wae seneng karo masakan Indonesia, mosok wong Indonesia dhewe malah ora doyan? Rak kleru to? Mula saka kuwi, ayo kabeh masyarakat Indonesia bareng-bareng nglestarekake panganan khas daerah, supaya ora ilang ketiban jaman lan tetep dadi kebanggaan bangsa.
Komentar
Posting Komentar